يا ابن الحلال اللي تشكى علينا=حنّا لنا بوضع على الله مشاكيه
كانك تحرى للعطا مـن يدينـا=عزالله إنك عندنا ما أنت لاقيـه
ماهو ردى بس أرثع الوقت فينا=ماعندنا ماناكلـه دون نعطيـه

يابنت ياللي بالمساجد تطوفين=كفي يدينك قبل نأخـذ ريالـك
حنا ترانـا كلنـا مستحقيـن=ماهو أنتي اللي مستحقة لحالك
لو لا الحيا شفتي وزانك ثلاثين=أحد يمين منك وأحدٍ شمالـك
مرفعيـن إيديننـا ومتقاعيـن=الموجب إن أحوالنا مثل حالك

أنـا لقيـت البنـك مثـل اخويايـه=مايقضي الحاجة إلى جـاه محتـاج
أمس الضحى مريـت كـل زملايـه=وكلٍ عطى لـه بالمعاذيـر منهـاج
وضنيت باقي فـي رصيـدي بقايـه=وحركت ناصٍ حارس البنك هجـاج
ودقيت رقمي صـح مابـه روايـه=طلع على الشاشة : لا داعي للإزعاج

يا أهل الوظايف قولوا الحمـدلله=على معوشتكم ولو رزقها ضنـك
أنا وجنسي رزقنا لـو وصفنـاه=حوذ الحنك مافيه زودٍ عن الحنك
ماطاح قرشٍ في يدينـا قرشنـاه=ودايم طفارى الله يجيرك ويامنك
البنـك لـولا لوحتـه ماعرفنـاه=من قل ماندخل على موظف البنك
ماغيـر نقـرا لوحتـه ونتعـداه=وإن قيل هذا البنك قلنا اتركه عنك
لاوا هنيـك يالغنـاوي هنـيـاه=ترقـد وحنـا بالدراهـم نمونـك
نفرح إلى من المعاش استلمنـاه=ويهـج منـا قرشنـا ويتزبنـك
والله يالوتصرف ربع ماصرفنـاه=ليصيبك السكر مع الضغط والتنك
ولولا جهدنا وجهدنا اللي بذلنـاه=ماتنفخ ذروبك وتمـلأ مخازنـك
مير المقدر مالنا غيـر نرضـاه=مرزقك منا وسقمة أرقابنا منـك

لاصار جدك ماتـرك لـك ملاييـن=ماهوب لازم تشتري لـه ضحيـه
قل له ياجدي جعلك من المناجيـن=والله ماتسـوى قيمـة البربريـه
عقبتني للديـن ومصـارع البيـن=ومن زين طبعك كاتبٍ لك وصيـه؟
لو أنت ما أخذ لك من الخد حوشين=يوم الأراض بلاش وسـط العليـه
إن كان تلقاني من أهل الدكاكيـن=مطنطـخٍ هالحيـن ميـة بمـيـه
لكـن ياجـدي ضحيتـك بعديـن=إن سهـل المولـى ثمنهـا عليـه
حنا بوقتٍ شين وأشين من الشيـن=فيه الخوي ماعـاد ياثـق خويـه

البارح أمسى اتلى معاشي بجيبي=ريال وأحرمني لك الله من النـوم
مغير غادٍ لـه صيـاح ونحيبـي=يقول ذا شـي مقـدر ومقسـوم
لـولا إنـي ريـالٍ رديٍ نصيبـي=إن كان ماني وسط جيبك من اليوم
وش بك من التجار ماتشتري بـي=حاجة ولومالك بها أيـات ملـزوم
أدخل على الله فكني وش تبيبـي=مادام جنسي في مخابيك معـدوم
أنته تخبر إنـي سـواة الغريبـي=في مجلسٍ عندك مضايق ومظلوم
وأنا الذي شرواك مايعتنـي بـي=بغضه بقلبي زارعه دايـم الـدوم
أبي الذي لاشدنـي يلتـوي بـي=مايفكني لو تظرب إيـده بقـدوم
إما يهوجس في وإلا يحكـي بـي=وغير السوالف فيّ ماعنده علـوم

يالله يارب سعود تطلق وساره=من شغلة حده زمانـه عليهـا
لولا الزمان اللي تعاقب دمـاره=لوقلت خذها قلت والله ما أبيها
لكن يوم الوقت قنبـع غبـاره=والناس عيا ربهـا لا يهديهـا
سير على جلابهـا واستشـاره=وقال الحظيظ من العرب يقتنيها
ترانزيت من الفقـر للتجـارة=ولا رابح إلا واحـد يشتريهـا
ماهي دشارة بس مثل الدشاره=الله لايبلـى الأجاويـد فيـهـا
الشغل فيها مثل وطي الجحاره=من لاتعداها يبي يـروح فيهـا
وبها الربح واجد لكن الخساره=كم واحد مثلي قبـل يشتكيهـا