بسم الله الرحمن الرحيم
الي الجميع صباحكم/مساكم شعر وجزاله هذه القصيده للشاعر محمد بن عبدالله ال فروان الوعله اليامي القاها على قبيلة الدواسر في حفل قبيلة الوعله ويام لقبيلة الدواسر هذه القبيله العريقه التي تستحق المدح
المناسبه ان الاخ فهد بن عايض بن حربان ال فروان الوعيلي سمى ولده على الشيخ فيصل ال شواي الدوسري واقبلنا عليهم بجمع يفوق 100 رجال من ابناء قبيلة يام بهديه لفيصل ال شواي من سميه واستقبلونا واكرمونا الله يكرمهم واقبلو علينا الاد زايد بجمع يفوق 60 رجال بهديه لسميهم والقى الشاعر محمد هذه القصيده
بديـت باسـم الله عـلام الغيـوب
ياعالـم النيـه وماتخفـي القلـوب
يا مسير الدنيا ويا منشي الهبـوب
متكـفـل بــالارض وبسكانـهـا
يا منجي يونـس بغبـات البحـور
ياعالم ماكان فـي وسـط الصـدور
الطف بنا من جور واهوال القبـور
فـي حفـرةٍ متهـايـل جيلانـهـا
ما عاد ينفع كود ما حطـت يـداك
من خير ولا شر هـذا هـو جـزاك
نكير من قدمك ومنكـر مـن وراك
ماتنفـع الخـلان مــع خلانـهـا
تملي عليك علومك اللـي ماضيـات
السيئـه ولا العـلـوم الطيـبـات
في ساعه ترجي مـن الله الثبـات
الساعـة اللـي غايـب شيطانهـا
يالله برحمتـك الكريمـه طامعيـن
انت الامل وانت الرجا وانت المعين
نرجيك عطفك يا معيـن الصابريـن
لا حـدت الانفـس علـى ميزانهـا
من بعدها يا مرحبا مرحـب شـلال
ترحيبةً اصفى مـن المـي الـزلال
ترحيبة ترقى علـى روس الطـوال
الطيـب مبداهـا وهـو عنوانـهـا
يا مرحبا يا عيـال زايـد يـا هـلا
بالعيـن مدهلكـم وبالقلـب إنـزلا
يا مرحباً مـن زود تقديـر وغـلا
ماغرد القمـري بعالـي اغصانهـا
نسل الوداعيـن المطاليـق الكـرام
اهل الثمان اللي لهـم عـز ومقـام
سوالف تبقى لهـم فـي كـل عـام
تحكي بها الشبـان مـن شيبانهـا
الاولـه ولـد المبيعيـج الصغيـر
يوم انه يوم العيد مع ولد القصيـر
يلعب وزل وزلتـه جـات المصيـر
ثـم حولـت جثتـه فـي دميانهـا
ثم خبلت امه بالعـزاوي والصيـاح
وتجمـع اللـي ساكنيـن بالمـراح
واقبل عليهم ناصـرٍ عجـلٍ ذحـاح
ويقول حُرم الجار ما اللـي خانهـا
قالو له ابنك قـال ياعلـم الشمـات
ثم قام يبحث عنه في كـل الجهـات
ولقاه عنـد أمـه تغطيـه بعبـات
جـره وخـلا امـه تهـل اعيانهـا
وتله على الميدان ثم طشـر دمـه
وعلى ولد جاره حذف بـه ورجمـه
انا اشهد انه صان جـاره وحشمـه
يستاهـل البيضـاء مـع نيشانهـا
و الثانيه فالعاطفـي يومـه نزيـل
عند ابن ولمان سعد جـار ودخيـل
ساق القدر للعاطفي واصبـح قتيـل
وصكت عليه البير بيـن احظانهـا
في بير ابن ولمان ساق بـه القـدر
لكنه جار اللي علـى العليـا ظهـر
من دون جاره ماخـذا فيهـا عـذر
دبٌـل ديتـه وجيرتـه مـا هانهـا
والثالثـه فاللـي يخـون بسـيـره
من بينهـم مافيـه رجـل يجيـره
المـوت فـال لــه ولابتخـيـره
نسـل العويمـر فعلهـم برهانهـا
من شان غيره مايخـون بصاحبـه
يجعـل براسـه لابـةٍ بتحاسـبـه
يترك طريق العيب ماهو بقـار بـه
والنفس ما يتبـع هـوى شيطانهـا
والرابعه مانع ولـد منصـور يـوم
ابن سليمٍ صار فـي وجهـه ثلـوم
عثر وصار بجبهته مثـل الرسـوم
عطـاه صفـراً تلتـوي بعنانـهـا
والخامسه فاللي سقط فوقـه جـدار
ساقو الديه لانه لهم ضيـفٍ وجـار
فايز سليل خليف من سـاق المثـار
ودَايـةٍ للجـار مــن جدرانـهـا
والسادسه من حدته شهـب الليـال
واركى عليه الوقت بحمـولٍ ثقـال
زبن على الله ثم على روس الرجال
اللي تنجـي مـن زبـن باركانهـا
ويصير كنـه واحـد مـن ربعهـم
تاسم عصاه ويحتمي فـي جمعهـم
وسم العصا بيـن القبايـل طبعهـم
من فاز به عاش بـذرى شيخانهـا
والسابـعـه فالـتـارده بتـردهـا
لو كان حد المـوت واقـف ضدهـا
ما تهتني ليـن انـه يامـن حدهـا
والتـارده ترجـع علـى رعيانهـا
والثامنه فالضيف والطرقي يصـان
يبشر بسمن الضان وكباش سمـان
تثني القرى للضيف لو جار الزمان
تكسب علوم الطيب فـي ضيفانهـا
هـذا قليـل مـن فعـول جدودهـا
اللي على العليـا تحشـد جنودهـا
مافيه شـيٍ فـي الجميـل يكـوده
تتبـع مسيـر جدودهـا شبانـهـا
دواسر لا صـاح صيـاح الشليـل
ودقت طبول الحرب مافيهـم ذليـل
لا ثار عج الخيـل وازداد الصهيـل
تقبـل فوارسهـا علـى فرسانهـا
دواسـر بالـدم مرويـن الرمـاح
كم فارسٍ من فعلهـم وقـع وطـاح
وامسو بني عمه يجـرون النيـاح
من جور قوم مـا تطيـب اكوانهـا
دواسر تعطي على كسـب الجميـل
ارواحهـا والمـال والعلـم النبيـل
لين انها حازت على موقـع سهيـل
والمرجلـه باشكالـهـا والوانـهـا
ذا الليل عيد ويا عسى الليله يعـود
يشهد علينا الله وخلـق الله شهـود
الطيب والنومـاس بالدنيـا يسـود
ومن يزرع الحسنى يحصد احسانها
دام البقاء باللي جمع بيـن الرجـال
اللي ظهر علمه على روس الجبـال
فهد ولد عايض جمع جزل الخصـال
بيوتـه لربعـه فـاتـح بيبانـهـا
يوم انه سمى بالاصيل ابن الاصيـل
فيصل ولد عودٍ كما السيف الصقيل
ومن ال شوايٍ هل البـاع الطويـل
الابـة اللـي عـامـرٍ ديوانـهـا
حيث السمى بين الرجال اكبر دليـل
على المعزه والغـلا واكبـر دليـل
انه مع اهل العرف جيلٍ بعـد جيـل
يجري مع الاجواد ضمـن ازمانهـا
ما يشترى الا اسماء عريبين الجدود
اللي على الرجله يحثـون الجهـود
اللي تفاخر بسمهـا بيـن الحشـود
واللي يشـرف ذكرهـا واعلانهـا
فيصل وفيصـل شـاربٍ المرجلـه
واليـا بغيتـه فزعتـه مستعجلـه
اما يجيـب الطيـب لـك ولا جلـه
ومن الصقـور موالـفٍ شيهانهـا
الهـرج وافـي والفعايـل وافـيـه
والوجـه سمـح والنوايـا صافيـه
وقفات جـوده واضحـات وخافيـه
ومن القصايـد يستحـق سمانهـا
والرجل بين امرين مامنهـا مجـال
اما رفـع ربعـه بفعلـه والمقـال
ولا بفعله طاح ثـم طاحـت رجـال
بعض الصقـور تخونهـا جنحانهـا
الرجل يعمل والعـرب عنـه تقـول
امـا تقولـه قصـد ولا بالفضـول
ثم ينتشر بين العرب عرضٍ وطول
والناس ما نقـدر نحجـر لسانهـا
وانا اشهد ان فيصل تعلى النايفـات
وجمل بني عمـه بفعـل الطيبـات
عينـه تخايـل للنجـوم المرقبـات
يرومهـا حتـى جلـس بوزانـهـا
لا شـك مايحتـاج للطيـب اسئلـه
لاصار مـن منبعـه ولا مـن هلـه
وانا اشهد ان جمع الدواسر مدهلـه
قومٍ يجمـل فـي اللـزوم حصانهـا
فيا مرحبا مليون يا اهـل الطايلـه
يا مرحبا مليـار يـا اهـل النايلـه
يـا مرحبـا مـا سبلـت مخايلـه
وما ربعت عقـب الحيـا ريضانهـا
قلته وانا من لابتـي صبيـان يـام
هم تاج راسي هم عضودي والحزام
وهم درع جنبي في الشدايد والزحام
متـوارثٍ الطيـب مـن جدانـهـا
وارجو المعذره لا حصل منا قصور
الطيب والريحان وانـواع البخـور
والعود الازرق مع نقيـات العطـور
منـا لكـم مهمـا تزيـد اثمانـهـا
منقول
